Монгол Улсын Их сургуулийн ректор Эрхэм ноён Очирхуяг,

Монгол-Японы хүний нөөцийн хөгжлийн төвийн захирал Эрхэм ноён  Даваадорж болон энд хүрэлцэн ирсэн Та бүхэнд энэ өдрийн мэндийг дэвшүүлье.

Өнөөдөр Японд суралцах мэдээллийн яармагт оролцож байгаад талархал илэрхийлье.

Юуны өмнө, энэ удаагийн мэдээллийн яармагийг зохион байгуулахад хүчин чармайлт гаргасан Монгол-Японы хүний нөөцийн хөгжлийн төвийн хамт олон, Японоос зорин ирж оролцож буй их сургуулийн холбогдох хүмүүс болоод хамтран ажилласан Японд суралцаж төгссөн монгол залуус Та бүхэнд баярлалаа.

Өнөөдөр Та бүхэн Японд суралцах хүсэл тээн энд хүрэлцэн ирсэнд баяртай байна. Монголын улс төр, эдийн засаг, урлаг, эрүүл мэнд, соёл зэрэг олон салбарт Японд суралцаж төгссөн хүмүүс улс орноо төлөөлөн амжилттай ажиллаж байгаад бахархаж байна. Өнөөдөр энд хүрэлцэн ирсэн ректор Очирхуяг ч мөн адил тэдгээрийн нэг билээ. Үүнээс харахад, Японд суралцах нь Та бүхнийг хөгжүүлэх чухал боломж болно гэж бодож байна.  

Энэ удаагийн яармагт ирсэн Та бүхний дунд Японд сурахаар хэдийнээ шийдэж, бэлдэж эхэлсэн хүн ч байгаа биз ээ. Өмнөө том зорилго тавьж, Монголын болон дэлхийн ирээдүйг авч явах хүн болон өсөж хөгжихийг хүсэж байна.

Монгол хэлэнд “Эрдмийг хичээлээр, эрлийг сургаар” гэдэг зүйр үг байдаг гэж сонссон. Монголын залуус Та бүхний сурлага хөдөлмөр, бүх талын хичээл зүтгэл  үр өгөөжөө өгч, Японд суралцах мөрөөдөл биелэх болтугай. Мөн Японд суралцаж олж авсан мэдлэг, туршлагаа ашиглан өндөр амжилт гаргана гэдэгт чин сэтгэлээсээ найдаж байна.

Мөн энэхүү мэдээллийн яармаг Японд суралцахтай холбоотой үнэн зөв мэдээллийг өгөх маш үнэ цэнтэй боломж тул Та бүхэн сайтар сураглан өөртөө тохирсон их сургууль, хөтөлбөрөө олж аваасай хэмээн хүсэж байна.

Ингээд Та бүхэндээ амжилт хүсье. Анхаарал тавьсанд баярлалаа.

Жил бүр уламжлал болгон зохион байгуулдаг арга хэмжээ болох “Японд суралцах мэдээллийн яармаг”-т хүрэлцэн ирсэн Та бүхэнд туйлын их баярлалаа. Та бүхний амрыг эрж мэндчилье.

15 дахь жилдээ зохион байгуулагдаж байгаа тус үйл ажиллагаанд маань одоог хүртэл Япон талаас давхардсан тоогоор нийт 179 их сургууль, давхардаагүй тоогоор 56 их сургууль, Монгол талаас нийт 17,000 гаруй оюутан залуус оролцжээ.

Энэ удаагийн үйл ажиллагаагаараа бид дан ганц их сургуулиудын мэдээлэл гэлтгүй Японд суралцахад зайлшгүй өгөх шалгалт түүнд бэлтгэх арга, Японд сурах ерөнхий зөвлөмж, сураад ирсэн хүмүүсийн туршлага зэргийг ч мөн орхигдуулалгүй Та бүхэнд хүргэхийг зорилоо.

Манай энэхүү арга хэмжээнд Монголын олон хүүхэд, залуус хүрэлцэн ирж, өөрийн сонирхсон мэдээллээ авдаг Энэ хэрээр тэдэнд үнэн зөв мэдээлэл өгч, Японд сурч боловсрох, ажиллаж амьдрах бэлтгэл, чиглэлийг зөвөөр ойлгуулах нь энэхүү арга хэмжээний гол зорилго билээ. Ингэснээр Японд сурч, ажиллах, амьдрах үед тохиох зарим бэрхшээл, саад тотгороос зайлсхийх боломжтой болох төдийгүй, Япон орон, япончуудын амьдралын талаар зөв мэдээлэлдээ тулгуурлан тэдэнтэй мөр зэрэгцэн сурч, ажиллаж, амьдрах илүү таатай нөхцөлийг бүрдүүлэх болно. 

Оролцогсдоос хүссэн мэдээллээ олж авч, Япон улсад суралцахаар явагсдын тоо нэмэгдэж байгаад итгэлтэй байна. Япон орны сайн сайхныг мэдэрч, зөв төлөвшил, харилцааг сурч ирэн эх орондоо нэвтрүүлэн, хоёр орны харилцаа хамтын ажиллагаанд өөрийн гэсэн хувь нэмрээ оруулж, хоёр улсын харилцааны гүүр болон улсынхаа хөгжилд тус нэмэр болох зорилготой залуус улам олон болох болтугай.

Та бүхнийг өнөөдрийн арга хэмжээнд идэвхитэй оролцож, өөрийн сонирхсон мэдээллээ бүрэн дүүрэн олж аваад, Япон улсад сурч, амьдрах зорилгоо гүйцэлдүүлэхийг хүсэн ерөөе.

Хамтран зохион байгуулж байгаа Монгол дахь Япон Улсын элчин сайдын яам, ЖАЙКА болон хамтран ажиллаж буй бүх байгууллага, хувь хүмүүст халуун талархалаа илэрхийлье. Мөн Япон улсаас хүрэлцэн ирж, сургуулийнхаа талаарх мэдээллийг түгээж байгаа Японы их сургуулийн төлөөллүүд, холбогдох байгууллынханд гүн талархлаа илэрхийлье. Цаашид ч хамтран ажиллаж, бодит мэдээллийг түгээсээр байна гэдгээ илэрхийлье.

Бүх хүмүүст эрүүл энх, сайн сайхан бүхнийг хүсье. Эрмийн цагаан буян дэлгэрэх болтугай. Баярлалаа.