card

Мэндчилгээ

Япон Улсаас Монгол Улсад суугаа Онц бөгөөд Бүрэн эрхт Элчин сайд Кобаяши Хироюки

Монгол Улсын Их сургуулийн захирал Эрхэм ноён Бадарч,

Монгол-Японы хүний нөөцийн хөгжлийн төвийн захирал Эрхэм ноён  Даваадорж болон энд хүрэлцэн ирсэн Та бүхэнд энэ өдрийн мэндийг дэвшүүлье.

Амралтын өдөр хэдий ч өнөөдөр Японд суралцах мэдээллийн яармагт оролцож байгаад талархал илэрхийлье.

Юуны өмнө, энэ удаагийн мэдээллийн яармагийг зохион байгуулахад хүчин чармайлт гаргасан Монгол-Японы хүний нөөцийн хөгжлийн төвийн хамт олон, Японоос зорин ирж оролцож буй их сургуулийн холбогдох хүмүүс болоод дэмжлэг туслалцаа үзүүлж буй Японд суралцаж төгссөн Та бүхэнд талархлаа илэрхийлье.

Энэ удаагийн яармагт Японы 9 их дээд сургууль өөрсдийн сургуулийн талаар танилцуулах ба Японы оюутныг дэмжих байгууллага (JASSO), Монгол-Японы хүний нөөцийн хөгжлийн төв болон Японд суралцаж ирсэн төгсөгч нар Японд суралцах тухай зөвлөгөө өгөх болно. Мөн Японы Элчин сайдын яамнаас Япон Улсын Засгийн газрын тэтгэлэгт хөтөлбөрийн талаар Та бүхэнд танилцуулга хийнэ.

Японд ойролцоогоор 16,500 монголчууд амьдарч байгаагаас 4,000 орчим нь оюутан гэж сонссон. Энэ тоо нь Японд сурч буй гадаад оюутнуудыг улс орноор нь жагсаавал эхний аравт орох үзүүлэлт юм. Японы Элчин сайдын хувьд монгол залуучууд Японд сурах мөн түүнчлэн Японд сурч төгсөж ирээд улс төр, эдийн засаг, урлаг, анагаах, соёл зэрэг өргөн салбарт амжилттай ажиллаж байгаад баяртай бөгөөд урамтай байдаг.

Би анх Японы Гадаад хэргийн яаманд орсны дараа монгол хэл сурахын тулд Америкийн Индианагийн Их сургуульд 1 жил, Монгол Улсын Их сургуульд 1 жил нийт 2 жил гадаадад сурах боломж тохиосон юм. Одоо эргэн харахад, миний дадаж хэвшсэн зүйлсээс өөр үзэл бодол, өвөрмөц хэв маягтай таарсан маань гадаадад сурч байхдаа олж авсан амьдралын том туршлага болон үлджээ. Мэдээжийн хэрэг гэж бодож байсан зүйлс өөр газарт адилгүй гэдэгтэй нүүр тулж, тэрхүү өөр зүйлсийн цаадах түүх, соёлын талаарх ойлголтоо гүнзгийрүүлсэн маань миний амьдралд юугаар ч сольшгүй үнэтэй зүйл болсон юм.

Аль ч японы их сургууль өндөр түвшний боловсрол эзэмших боломжийг олгодог гэдэгт итгэлтэй байна. Түүнчлэн Япон орон Монголоос ялгаатай үзэл бодол, өвөрмөц хэв маягийг танилцуулж Та бүхний хувьд ирээдүйн эхлэл болох туршлага олж авах орон болно гэдэгт итгэлтэй байна.

Ингээд Та бүхнийг Японд суралцаасай хэмээн хүсэж байна. Баярлалаа.

Блокын гарчиг / img

Жайка Монгол дахь Төлөөлөгчийн газрын дарга Танака Шиничиро

Блокын гарчиг / img

“Японд суралцах мэдээллийн яармаг 2023”-т оролцож байгаа та бүхэнд энэ өдрийн мэнд хүргэе. 14 дэх удаагийн энэхүү яармагт Япон Улсын 13 их, дээд сургууль, байгууллага биечлэн болон материалаа танилцуулах байдлаар оролцож байна.

2022 онд зохион байгуулагдсан яармаг нь дэлхий даяар коронавирусын цар тахал тархсанаас хойш анх удаа танхимын хэлбэрээр зохион байгуулагдсан бөгөөд хоёр өдрийн дотор 2356 хүн хүрэлцэн ирсэн нь урд өмнөх жилүүдээс давсан үзүүлэлттэй байж, Японд суралцах хүсэл, сонирхол өндөр байгааг харуулсан.

ЖАЙКА нь “Монгол-Японы хүний нөөцийн хөгжлийн төвийн төсөл”-ийн Гадаадаас боловсон хүчин хүлээн авах, олон үндэстний соёл иргэншил зэрэгцэн оршиход дэмжлэг үзүүлэх үйл ажиллагааны хүрээнд 2023 оны 1-р сараас эхлэн "Монголын хүний нөөцийн карьерийн хөгжлийг дэмжих хөтөлбөр”-ийг эхлүүлж, Монголчуудыг Японд ажиллаж, суралцахад болон эх орондоо буцаж ирсэний дараа карьераа хөгжүүлэхэд нь дэмжлэг үзүүлэх үйл ажиллагааг явуулж байна.

Энэ удаагийн “Японд суралцах мэдээллийн яармаг 2023”-аар дамжуулан олон хүн Японд суралцах мөрөөдлөө биелүүлж, эх орондоо ирээд Монгол Улсын эдийн засгийн хөгжилд хувь нэмрээ оруулж, Монгол, Япон хоёр орныг холбох гүүр болон ажиллана гэдэгт итгэлтэй байна.

Монгол-Японы хүний нөөцийн хөгжлийн төвийн захирал Ц.Даваадорж

Монгол Японы хүний нөөцийн хөгжлийн төвөөс хамтран зохион байгуулдаг уламжлалт арга хэмжээ болох мэдээллийн яармагт хүрэлцэн ирсэн Та бүхний амрыг айлтган мэндчилж байна.

Энэ жилийн энэхүү арга хэмжээ маань цар тахлын дараах сэргэлтийн үед болж байна. 

14 удаагийн мэдээллийн яармагийн үйл ажиллгаанд оролцохоор Японы 9 их сургуулийн төлөөлөл биечлэн хүрэлцэн ирээд байна. 4 сургууль танилцуулга материалаа өгч оролцож байгаа юм.

2 өдрийн турш явагддаг энэ яармагт монголын олон залуучууд хүрэлцэн ирж өөрийн сонирхсон мэдээллээ авдагт бид туйлын их талархалтай байдаг. Манай мэдээллийн яармагт оролцож, улмаар Японы их сургуульд элсэн суралцсан хүмүүс нэмэгдсээр байгаад бид туйлын их баяртай байдаг. Энэ хэрээр тэдэнд үнэн зөв мэдээлэл өгч, Японд сурч боловсрох, ажиллаж амьдрах бэлтгэл, чиглэлийг зөвөөр ойлгуулах нь энэхүү арга хэмжээний гол зорилго билээ. Ингэснээр, Японд сурч, ажиллах, амьдрах үед тохиох зарим бэрхшээл, саад тотгороос зайлсхийх боломжтой болох төдийгүй, Япон орон, япончуудын амьдралын талаар зөв мэдээлэлдээ тулгуурлан тэдэнтэй мөр зэрэгцэн сурч, ажиллах, амьдрах илүү таатай нөхцөлийг бүрдүүлэх болно.  

Япон орны сайн сайхныг мэдэрч, зөв төлөвшил, харилцааг суран эх орондоо нэвтрүүлэх, хоёр орны харилцаа хамтын ажиллагаанд өөрийн гэсэн хувь нэмрээ оруулж, хоёр орны харилцааны гүүр болон улсынхаа хөгжилд тус нэмэр болох зорилготой залуус олон болох болтугай.

Та бүхнийг 2 өдрийн арга хэмжээнд идэвхитэй оролцож, өөрийн сонирхсон мэдээллээ бүрэн дүүрэн олж аваад, Япон улсад сурч, амьдрах зорилгоо гүйцэлдүүлэхийг хүсэн ерөөе.

Хамтран зохион байгуулж байгаа Монгол дахь Япон Улсын элчин сайдын яам, ЖАЙКА болон хамтран ажиллаж буй бүх байгууллага, хувь хүмүүст халуун талархалаа илэрхийлье.

Эрүүл энх, сайн сайхан бүхнийг хүсье. Баярлалаа.

Блокын гарчиг / img